Жаһандық жылынуға байланысты орын алып отырған климаттың өзгеруі тек табиғи апаттарды, соның ішінде, құрғақшылықты тудырмайды, сонымен қатар, Зика вирусы, Денге безгегі, тырысқақ, т.б. секілді әлі күнге толық жойылмаған инфекциялық індет ошақтарын көбейтеді. Бұл жайында Колорадо университетінің (University of Colorado) ғалымдары мәлім етті. Зерттеушілер тобының жетекшісі Сесилия Соренсен (Cecilia Sorensen) келтірген дерекке қарағанда, климаттың өзгеруі тек экономикалық-әлеуметтік, экологиялық қиындықтарға толы болмайды, сондай-ақ, адамзаттың денсаулығына қауіп төндіреді. Яғни, алдағы уақытта адамзатқа жан-жақты қауіп төніп келеді. Бұдан әлемнің кез келген елі тыс қалмайды. Мәселен, ежелден түрлі індет ошағы саналатын Африка құрлығында безгек індеті өршіп кеткен. Эквадор белдеуінде су температурасының өзгеруінен (мысалы, эл-Ниньо өзені), жылып кетуінен Денге безгегімен сырқаттану қатері артқан.