Алдыңғы аптада әлемдік бұқаралық ақпарат құралдарын шулатқан, отқа оранған Лондон шаһарындағы 24 қабатты Grenfell Tower зәулім тұрғын үйдің бір пәтерінен құтқарушылар іздестіру шарасы кезінде 42 адамның сүйегін тауып алды. Өлгендердің барлығы жанұшыра төменнен сумаңдаған жалын тілінен қашып, жоғары қабаттағы пәтерге келіп тығылған. Алайда, ажалын осы пәтерден тапты. Өрттен қаза тапқандар арасында ересектермен қатар балалар да бар. Бұл пәтер бауырластар зиратына айналды. Айта кетейік, соңғы мәлімет бойынша бұл өрттен 79 адам көз жұмған. Олардың кейбіреуінің түрін тану мүмкін болмаған. Күйіп кеткендіктен. Өрттің кесірінен баспанасыз қалған 600-ге тарта адам жақын маңдағы қоғамдық орталықтарға, мешіттер мен шіркеулерге жайғастырылды.