Біріккен Ұлттар Ұйымының геноцид, адамзатқа қарсы қылмыс және әскери қылмыс үшін жауапкершілікке тарту жөніндегі тергеуші тобы Ирак аумағындағы езидтерге қарсы содырлар тарапынан жасалған зорлық-зомбылықты геноцид деп ресми таныды. Бұл жайында islam.kz порталы ресейлік «Жаңалықтар» ақпарат агенттігіне сілтеме жасай отырып мәлім етеді. Дәлірегі, БҰҰ-ның аталған тобына жетекшілік еткен арнайы кеңесшісі Кәрім Хан бұл тараптағы халықаралық стандарттарды басшылыққа ала отырып, БҰҰ-ның Қауіпсіздік кеңесінде өткен мәжілісте осындай мәлімдеме жасады.

Осы орайда Уикипедия электронды энциклопедиядан мынадай деректі келтіре кетуді жөн көріп отырмыз: Езидтер – түп тегі күрд болғанымен этнос ішіндегі этнос, яғни, субэтнос саналады. Наным-сенім ерекшелігіне байланысты. Езидшілдік – синкретті дін. Заратустра, ислам, христиан және иудалық элементтер қамтылған монотеистік сенім. Езидтер де бір Жаратушыға, оның жеті періштесіне сенеді, аталған періштелердің ең үлкені ретінде Малак Таусты таниды. Аталған наным-сенімді езидтер пайғамбар дәріжесінде көретін, ХІ-ХІІ ғасырларда өмір сүрген Әді ибн Мұсапыр қалыптастырған.

Қосымша мәлімет:

Езидтер – Ирактың солтүстігін мекен етеді. 2014 жылы езидтер Ирак жерінде ойран салған содырлар тарапынан қатаң қуғын-сүргінге ұшыраған, зорлық-зомбылық көрген болатын. Наным-сеніміне байланысты. Езидтерді кәпір санаған содырлар 10 мың езидке дейін қырып салған.