Бұл сұмдықты арзан сенсация қуатын саржағал басылымдардан алды деп ойлап қалмаңыз. «Әр елдің салты басқа, иттері қара қасқа» десек те, ел естімеген сұмдықтар көп екен мына жалғанда. Осыдан бір-екі күн бұрын ғана туыстық неке туралы хабар таратып едік, енді, міне, табытта жатып табысатындар жайында ақпарат таратуға тура келіп отыр. Бұл арада осы заманғы Таиланд жерінде әлі күнге көненің көлеңкесіндей қалмай келе жатқан, қайдағы жоқ ырымға негізделген жабайы дәстүрі турасында сөз болып отыр. Біз сіздерге ел астанасындағы будда шіркеулерінің бірінде болған үйлену тойының тарихын қысқаша баяндап бермекпіз. Төмендегі суреттен көріп отырғандарыңыздай, қалыңдық пен күйеу жігіт неге табытта жатыр? деген сауал мазалайтыны белгілі. Олардың соқыр сенімі бойынша табытта жатып некесін қидырғандар бақытты да баянды өмір сүреді-мыс. Олардың некесін «он екіде бір гүлі ашылмаған» будда монахы қиятын көрінеді. Мына суреттегі үйлену тойы Ван Такиен шіркеуінде болған.