Ауадан су алудың тағы бір әдісі пайда болды

Бірегей құрылғы, тіпті, құрғақшылық жайлаған әрі ылғалдылығы төмен аймақтарда ауадан су алуға мүмкіндік береді. Бұл жайында islam.kz порталы pnas.org ақпарат көзіне сілтеме жасай отырып мәлім етеді. Невада университетінің зерттеуі суды ылғалдылықтың 10%-ға дейінгі төмен деңгейінде де жинауға мүмкіндік беретін инновациялық әдісті ұсынады. Айрақша технологияның құпиясы арнайы материалда жатыр: гидрогел мембранасы ауадан ылғалды тиімді сіңіріп, оны сұйыққа айналдыруға қабілетті. Бұл технологияның көмегімен ауаның ылғалдылық деңгейі 35% кезінде бір шаршы метрге 5,5 келіге дейін су алуға болады, бұл мөлшер екі адамның бір тәулікте пайдаланатын су мөлшеріне тең. Ылғалдылығы жоғары болған кезде жиналатын су мөлшері 16,9 келіге дейін артады. Ғалымдар бұл тарапта табиғи суайрық принципін қолданды: тропиктік өсімдіктер мен бақалар су балансын сақтау үшін қоршаған ортадан ылғал алуға қабілетті. «Бұл жануарлар су алу үшін мембраналық құрылымдарды шебер пайдаланады. Біз бұл құбылысты зертханада тудыра алдық», дейді ғалымдар. Атмосферадан ылғал сіңірудің (аулаудың) фазалық циклдерін, яғни, кезең-кезеңімен жүзеге асатын процестерді қажет ететін сорбенттер (сорғылар) сияқты ауадан суды алудың әдеттегі әдістеріне қарағанда, жаңа мембрана суды бір мезгілде сұйық күйінде жинауға және сақтауға мүмкіндік береді. Аталған жоғарғы оқу орнының өкілдері жаңа технология тиімділігімен ғана емес, сонымен қатар, үнемшілдігімен де артықшылыққа ие екенін алға тартып отыр. Бұл материалдың құны шаршы метріне шамамен 17 доллар тұрады. Күн батареясының арқасында материал автономды режимде, яғни, дербес жұмыс істейді. Бұл ерекшелік те күн шуағы мол, жауын-шашын аз түсетін өлкелерде құрылғының тиімділігін арттырады.

Принцип сбора воды по методу исследователей из Университета Невады