Экономикада болсын, саясатта болсын, әлеуметтік салада болсын, қасиетті Құранның үкімдерін басшылыққа алып, өмір сүру салтына айналдырған қай ел дейсіз ғой? Қызық болғанда, бұл жағынан ислам діні ресми бекітілген елдерде емес, мұсылман емес елдің аты озып тұрғанын айта кету керек. Дәлірегі, Жаңа Зеландия ислам индексі бойынша өзге елдерге үлгі бола алады. 2010 жылы Джордж Вашингтон университетінің ғалымы, тегі ирандық Хұсейн Асқари әлем елдерін шариғат талаптарының сақталуы бойынша саралап, сараптама жасағанда осындай қорытындыға келген. Оның айтуынша, мұсылман елдеріндегі тамырын тереңге жіберген сыбайлас жемқорлық, әділетсіздік секілді келеңсіз құбылыстар аталған елде кездеспейді.