Жаңа жылдан бастап Халыққа қызмет көрсету орталықтарымен қош айтысамыз. Олардың орнына әлеуметтік қорғау, жер қатынастары, мүлікті рәсімдеу салалары біріктірілген «Азаматтар үшін Үкімет» мемлекеттік корпорациясы құрылады. Бұл туралы Инвестициялар және даму министрінің орынбасары Сәкен Сәрсенов мәлімдеді.

 Халық енді бір корпорациядан 700-ден аса қызмет түріне қол жеткізе алады. Яғни еліміздің азаматтары жер телімдерін рәсімдеу, жылжымайтын мүлікті тіркеу немесе зейнетақыға қажетті құжаттардың барлығын бір жерден алатын болады.
Мемлекеттік корпорация құру – азаматтарды ақпараттық қамтамасыз етудің бірден-бір жолы. Бұл жұмыстар Елбасының «100 нақты қадам» Ұлт жоспары аясында іске асып отыр.