Құрметті сауал жолдаушы!

Төрт мәзһабтың төртеуінде де әдетте киіп жүрген жұқа шұлыққа мәсіх тартуға болмайды. Төрт мәзһаб ғалымдарының шұлыққа мәсіх тартуға байланысты қойған (егжей-тегжейлі нюанстарын айтпағанда) негізгі екі шарты бар:

• Шұлық қалың болуы керек.
• Онымен киіп далада жүре алу керек. (Ханафи мәзһабында шұлықтың 12 мың қадам жүруге шыдайтындай болуы ләзім).

Одан өзге, қазіргі замандағы жұқа шұлықтарға төрт мәзһабта да мәсіх тартуға болмайды, өйткені олар талаптарға сай келмейді. Мәсіх тартқан жағдайда дәрет есептелмейді.

Сәйкесінше, сәләфи бағытындағы бір мұсылманның дәрет алу барысында шұлыққа мәсіх тартып, артынша имамдыққа шыққанын көрсеңіз, оған ұюға болмайды, себебі дәретінің толық емес екеніне анық көзіңіз жетіп тұр. Ал оның нақты шұлыққа мәсіх тартқанын көрмеген болсаңыз, ұйы беруге болады, өйткені дәрет алғанда аяғын жуып келген болуы ықтимал (себебі олар да дәреттің төрт парызына сенеді).

Мұндай жағдайда тәптіштеп сұрауға біз міндеттелмейміз. Оның үстіне, имамдыққа шыққан әрбір адамнан «Дәретің бар ма?» деп сұрап тұрған да жөн емес. Оның арты жамағат арасында дау-дамайға, ұрыс-керіске ұласуы мүмкін. Нақты білмеген нәрсемізді Аллаға қалдырған — ең оңтайлысы!

Аллаһу аъләм! Дұрысы — Аллаға мәлім! Әлхамдулилләһи Раббиль алямин!