Қытайдың China Three Gorges Corporation (CTG) корпорациясы әлемдегі ең ірі гибридті энергия кешенін коммерциялық пайдалану режиміне енгізді. Бұл жайында islam.kz порталы өз кезегінде Naked Science мерзімді басылымына сілтеме жасай отырып мәлім етеді. Гоби шөлінде орналасқан объекті күн батқаннан кейін литий-ионды аккумуляторларды пайдаланбай электр энергиясын өндіруді жалғастырады. Шыңжың-Ұйғыр автономиялық ауданының Хами ауданында салынған қуаты 1000 мегаватт стансаның басты ерекшелігі - энергияны жылу түрінде сақтау жүйесінде. Батареяның орнына балқытылған тұз пайдаланылады, ол электр стансасына қараңғы түскеннен кейін тағы сегіз сағат электр энергиясын өндіруге мүмкіндік береді. Энергетикалық кешен 900 мегаватт фотоэлектрлік күн панелін және 100 мегаватт шоғырланған күн электр стансасын біріктіреді. Ол Тян-Шан тауының оңтүстік етегінде 1 817 гектар аумақты алып жатыр. Күндіз негізгі міндетті электр энергиясын желіге тікелей беретін күн панелдері орындайды. Шоғырландырылған күн электр стансасы басқа принцип бойынша жұмыс істейді: 800 мың шаршы метр алаңда орналасқан 260 мың жылжымалы айналар күн сәулесін шоғырландырып, ерітілген тұзды 550 °C-қа дейін қыздырады. Алынған жылу арнайы резервуарларда сақталады. Күн батқаннан кейін ол турбинаны айналдыратын және электр энергиясын одан ары өндіруді қамтамасыз ететін бу өндіру үшін пайдаланылады. Күн батқаннан кейін сегіз сағаттық жұмыс қуаты 100 мегаватт шоғырланған күн электр стансасы блогына ғана қатысты, ал қуаты 1000 мегаватт барлық кешенге қатысты емес. Яғни, түнде стансаның жылу бөлігі ғана жұмысын жалғастырады, ал фотоэлектрлік панелдер электр энергиясын өндіруді тоқтатады. Дәл осы блок күн энергетикасының басты проблемаларының бірі - күн сәулесіне тәуелділікті шешуге мүмкіндік береді. Бірегей жобада CTG жетілдірген Френелдің сызықпен шағылыстыру технологиясы қолданылады. Аталмыш компанияның мәліметінше, жаңа құрылым жылу энергиясын түрлендіру тиімділігін осы типтегі әдеттегі жүйелермен салыстырғанда шамамен 10% -ға арттырады. Қондырғы 46 тәуелсіз контурдан тұрады, соның арқасында жекелеген учаскелерге қызмет көрсету барлық стансаны тоқтатуды қажет етпейді.