Үндістанда сутегімен жүретін алғашқы жолаушылар пойызы жолға шықты

KAZINFORM – Үндістан экологиялық таза көлік инфрақұрылымын дамыту бағытында тағы бір маңызды қадам жасап, елдегі алғашқы сутек отынымен жүретін жолаушылар пойызын іске қосты, деп хабарлайды Анадолы.

Үндістанның Премьер-министрі Нарендра Моди сутек отынын пайдаланатын алғашқы жолаушылар пойызының жолға шыққанын ресми түрде бастады. Жаңа пойыз елдің солтүстігіндегі Харьяна штатындағы Джинд пен Сонипат аудандары арасында қатынайды.

– Үндістан экологиялық таза көлік жүйесін дамыту жолында маңызды қадам жасады, – деп жазды Нарендра Моди іске қосу рәсімінен кейін X әлеуметтік желісіндегі парақшасында.

Үндістанның Баспасөз және ақпарат бюросының мәліметінше, жоба сутекті сақтау, құю және пайдалану инфрақұрылымымен қатар, заманауи тартқыш технологияларды біріктіреді.

Жаңа пойыз 2 600 жолаушыны тасымалдауға есептелген. Осылайша, ол елдегі экологиялық таза теміржол жобаларының ең ірілерінің біріне айналды.

Айдар Оспаналиев

Қытайда сутегімен жұмыс істейтін әлемдегі алғашқы пилотсыз ұшақ сынақтан өтті

KAZINFORM — Хунань провинциясында ҚХР өзі әзірлеген мегаватт класты сутегі қозғалтқышымен жұмыс істейтін 7,5 тонналық AEP100 ұшқышсыз жүк ұшағының әлемдегі алғашқы ұшуы өтті, деп хабарлайды Xinhua.

Жобаны Aero Engine Corporation of China (AECC) корпорациясы әзірледі. Компанияның мәліметінше, 16 минуттық сынақ штаттық режимде өтті. Күш қондырғысы ұшудың барлық кезеңінде тұрақты жұмыс істеді.

Сынақ кезінде жүк дроны 300 метр биіктікте 36 шақырым қашықтықты жүріп өтіп, жылдамдығы сағатына 220 шақырымға жетті. Әуе кемесі маневр бағдарламасын аяқтағаннан кейін аман-есен қонды.

AECC сынақтың сәттілігі Қытайда сутегі отынымен жұмыс істейтін ұшақ қозғалтқыштарында толық технологиялық циклдің дамығанын растайтынын атап өтті. Бұл қадам авиацияда сутегі энергиясын өнеркәсіптік қолданудың негізін қалайды.

Сала мамандары жасыл сутегінің құны төмендеген сайын мұндай қозғалтқыштар тиімділік пен энергия қауіпсіздігі тұрғысынан бәсекеге қабілетті болады деп шамалап отыр.

Зарина Туғанбаева

Қытайда сутегімен жұмыс істейтін әлемдегі алғашқы пилотсыз ұшақ сынақтан өтті