Қытай ғалымдары қатерлі ісікті емдеу бағытындағы зерттеуге басымдық беріп отыр. Бұл жайында islam.kz порталы South China Morning Post ақпарат көзіне сілтеме жасай отырып мәлім етеді. Бейжіңнің биотехнологиялық саласы стратегиялық маңызға ие болғандықтан Америка құрама штаттарының назарын аударуда. Қытайда дәрі-дәрмектердің клиникалық сынақтарын тіркеу көрсеткіші өткен жылы рекордтық деңгейге жетті: 5 000-нан астам сынақ тіркелген. Бұл көрсеткіш елдегі дәрі-дәрмектерге жаңа кандидаттар санының өскенін білдіреді. Дәлірегі, дәрілік заттардың клиникалық сынақтарының жалпы саны 2025 жылы 5 215-ке жетті. Бұл шама ұлттық медициналық тауарлар басқармасы таяуда жариялаған есепке сәйкес 2020 жылы тіркелген көрсеткіштен екі есе артық. Қытай компаниялары мен мекемелері барлық тіркелген сынақтардың 93 пайызына бастамашы болды немесе қаржыландырды. Олардың 92 пайызы Қытай аумағында өткізілді, ал қалғандары елдегі пациенттік мекемелерді қамтитын жаһандық зерттеулердің бір бөлігі болды. Қатерлі ісікті емдеуге қатысты жаңа дәрілер ең көп сынақтан өтсе, одан кейін тері, көз, құлақ және тамақ ауруларына арналған дәрі-дәрмек, сусамыр (диабет) және қалқанша безі аурулары сияқты гормондық және зат алмасу процесіндегі ақауларды жоюға бағытталған дәрі-дәрмек, сондай-ақ, инфекциялық аурулардың алдын алуға арналған екпелер де сынақтан өткізілген. Дәстүрлі қытай медицинасының тиімділігін респираторлық ауруларға, сондай-ақ, психикалық және неврологиялық ауытқуларға сынап көру белең алып келеді. Қытай дәрі-дәрмегін өндірушілер фармацевтикалық дәрі-дәрмектердің құнын белгілеудің жаһандық тізбегінде маңызды ойыншыға айналып келеді, сонымен қатар, отандық дәрі-дәрмек көбірек шетелге жиі экспортталатын болды. Ақпан айында Калифорнияда өткен Outsourcing in Clinical Trials конференциясында ұсынылған дерек Қытайдағы клиникалық сынақтар АҚШ-қа қарағанда 50-60 пайызға арзанға түсетінін және көп уақытқа созылмайтынын көрсетті. Қытайдың биотехнологиядағы жетістіктері америкалық саясаткерлер мен мамандарды алаңдатып отыр. АҚШ-тың заң шығарушылары биотехнологиялық инвестицияға ұлттық қауіпсіздік тұрғысынан келуді реттейтін заңды (BINSA) енгізді – бұл арада америкалық лицензиялық мәмілелерді, бірлескен кәсіпорындарды және қытайлық биотехнологиялық компаниялардағы акцияларға бағытталатын инвестицияны АҚШ Қаржы министрлігі тарапынан тексеруді міндеттейтін заң жобасы турасында сөз болып отыр.