Бисмилләһир рахманир рахим

Намазда түкіру намазды бұзбайды, бірақ (жеңіл) мәкруһ болады. Дегенмен, түкіруге мәжбүр болып тұрса, далада оқып тұрған кісі сол жағына немесе аяғының астына түкіруіне болады¹. Пайғамбарымыз (с.а.у.) былай деген: «Сендердің біреулерің намазда тұрғанда Раббысына мінәжат етсін! Алдына қарай түкірмесін және оң жағына түкірмесін. Өйткені, оң жағында періште бар. Бірақ сол жағына немесе аяғының астына түкірсе болады»². Алайда, мешіттің ішінде түкіруге болмайды. Мешіттің ішінде намаз оқып тұрған кісі түкіруге мәжбүр болса, қағазға (салфетка) немесе беторамалға түкіріп, қалтасына салады да, кейін қоқысқа тастайды, өйткені мешіттің ішіне түкіру – харамға жақын мәкруһ. Осы тұрғыда Алла елшісі ("с.а.у.) намазында шатаса берген сахабаға "әғузуді айтып, сол иығына үшкіруін" айтады. Бұл хадистің арабша нұсқасында "тәфл" сөзі қолданған, ол біз білетін қатты түкіруді білдірмейді, аз ғана түкірік аралас үшкіруді білдіреді.