«Бірден үш талақ» айту күнә ме?
«Бірден үш талақ» айту күнә ме?
10 жыл бұрын 11127

Сәлеметсіз бе! Сіздердің сайттарыңыздан талаққа байланысты мақала оқыдым. Сол жерде бірден үш рет талақ ету - шариғатқа теріс ажырасу түрі деп берілген екен. Сұрайын дегенім, бірден үш рет талақ айту күнә ме? С. 

Сәлеметсіз бе! Қадірменді С., бір-бірімен түсінісе алмаған ерлі-зайыптылар бірден ажырасуды ойламай, арадағы келеңсіздіктерді тудырған факторларды анықтай отырып, бір мәмілеге келуге тырысып бағады. Мұсылман ер кісі «маған талақ айту құқы берілген» екен деп жөн-жосықсыз талақ айта беруі - қателік, күнә[1]. Осындай қателікке бой алдырмас үшін, шариғатымызда  ажырасудың қарастырылған өзіндік жолдары бар. Осы рет бойынша, шариғатқа сай ажырасу жолы және шариғатқа теріс ажырасу жолы деп бөлінген[2]. Бұлай бөлінуінің себебі, біріншіден,  ойланып-толғануға мүмкіндік беру, шынымен де, ажырасуға тұрарлық па соған көз жеткізу. Еш нәрсенің байыбына бармай, ойланбай, талақ етіп қойған кісі - артынан өкініп жатады. Екіншіден, шариғатқа теріс ажырасу түрі әйел кісіге де залалын тигізуі мүмкін.

Бір мезгілде  үш талақты айту  - күнә. Бұл  - «бидғи талақ», яғни, шариғаттың үйреткен ажырасу тәсіліне теріс. Өйткені, әйелін бірден үш талақпен талақ еткен кісінің бұл әрекетін естіген ардақты Пайғамбарымыз (с.а.у) ашуланып: «Алланың аяттарын мазақ еткісі келеді ме?!»[3], – деп ренжіді.

Сахаба Абдулла ибн Омар, бір кісінің үш талақты бірден айтқанын естігенде: «Әйелімен қайта некелесу құқы жойылды[4]. Бұл әрекеті – Ұлы Раббысына қарсы келу болып табылады. Ол сүннетке теріс әрекет етіп отыр»[5], – деген.

Ендеше,  ажырасуға бел буған мұсылман кісі «бірден үш талақ» айтуға асықпауы тиіс, бұл -  күнә.

[1]Әбу Заһра, әл-Әхуалуш шахсия – 287 бет.
[2]Толық мағлұмат үшін мына сілтемеге кіріңіз: http://islam.kz/kk/questions/januya/talaq/sharigatqa-sai-ajyrasu-joly-qandai-65/  
[3]Даруқутни – 3/272 бет. №(55)3879 хадис.
[4]басқа ерге тұрмысқа шықпайынша (және кейін одан ажыраспайынша), оған ол әйел адал емес
[5]Даруқутни – 3/283 бет. №(84)3908 хадис.; Сахих Муслим: Китабут Талақ «Бәбу тахрими талақил хаиз», №1471

Абдусамат Қасым