Уағалейкумуссәләм уә рахматуллаһи уә бәракәтуһ!

Құрметті сауал жолдаушы, деректерге қарағанда Пайғамбарымыздың (с.а.у.) былай дегендігі риуаят етіледі:

والمرأة تموت بجمع شهيد

«Аяғы ауыр болған күйі қайтыс болған әйел шейіт болады»[1].

Хадистің арабшасындағы «би-жумъин шәһид» сөзін Имам Нәуәуи: «ішіндегі баласы қалыптасқан әйелдің аяғы ауыр күйде қайтыс болуы», - деп түсіндіреді.

Ханафи ғалымы Мулла Алиюль Қари ол сөзге: «ішінде баласы болған күйі», - деп анықтама берген[2].

«Босанып жатып қайтыс болса...» деп түсінгендер де бар.

Демек, бір мұсылман әйел адам аяғы ауыр күйінде немесе босанып жатқан сәтінде дүние салған болса, ақыреттік шейіт саналып, о дүниеде шейіттік мәмілесін көреді, яғни, пейіштік болады деуге негіз бар.

Ең дұрысы – Аллаға мәлім!