Уағалейкумуссәләм уә рахматуллаһи уә бәракәтуһ!

Ол жайында айтылған «сахих хадис» бар. Жәһимә дейтін бір сахаба Пайғамбарымызға келіп: «Я, РасулаЛла! Мен де жорыққа аттанғым келеді. Сізден кеңес сұрай келдім», - дейді. Сонда Алла Елшісі: «Анаң бар ма?», - деп сұрайды. Ол: «Иә», - деп жауап береді. - «Анаңа қара. Шынында пейіш – оның аяғында», - деп айтады Пайғамбарымыз (с.а.у.)[1].   

Хадисші әл-Хәким ән-Нисабури бұл хадиске «келу жолы (иснәд) сахих» деп баға берген[2].  

Ал, «жалған хадис» дейтіндері аталмыш хадистің Мұса ибн Мұхаммед ибн Ъата есімді риуаятшы арқылы келген нұсқасына қатысты екендігі айтылады деректерде. Ол нұсқада «жәннәт аналардың аяқтарының астында» деп келтірілген. Әрбір хадисті жекелей тұрғыда талқылай келе хадис білгірлері аталмыш риуаятшы арқылы жеткен осы нұсқасына «жалған хадис» деп баға бергенімен, оның жоғарыда келтіріп өткеніміздей, басқа да «сахих иснадпен» келген нұсқалары жоқ емес.