Уағалейкумуссәләм уә рахматуллаһи уә бәракәтуһ!

Мұсылман дінінде «тергеу күні» деген түсінік жоқ. Яғни, асыл дінімізде «пәлен күн – сәтсіз күн, ол күні ештеңе істемеу керек» деген наным мүлдем орын алмаған.

Керісінше, аптаның барлық күндері берекелі деп қаралып, соның ішінде кейбір күндердің ерекшеліктері атап өтілген. Мәселен:

1. Жұма – аптаның ең қайырлы, берекелі күні. Бұл күнде дұға қабыл болатын сәттер бар.
2. Бейсенбі – жолға шығуға қолайлырақ күн. Алла елшісі (с.а.у.) бейсенбі күні сапарға шыққанды ұнататын[1]. Десе де, басқа күндері де жолға шығудың зияны жоқ.
3. Сәрсенбі – бір істі бастауға қолайлырақ күн. Әйтсе де, өзге күндері де іс бастауға болады.
4. Дүйсенбі мен бейсенбі – амалдардың көкке көтерілетін күндері. Сол себепті бұл күндері нәпіл ораза ұстаған ұнамды әрі сауапты.

Тоқ етерін айтқанда: аптаның белгілі бір күнін «сәтсіз», «іс бастауға болмайтын күн» деп санауға шариғи негіз жоқ. Апта күндеріміз берекеге толғай!

[1] «Сахих Бұхари».