Әлемдегі табысты ойыншылардың бірі, Лондон қаласының «Арсенал» футбол клубының жартылай қорғаушысы Месут Өзіл жасыл алаңда ойын өрнегін көрсетіп жүріп, көрермендерді бір қылығымен қайран қалдырған еді. Мұсылман адамның нанға қалай құрмет көрсететінін әрекетімен дәлелдеп, жанкүйерлерді тәнті етті. Нақтырақ айтқанда, ағылшындардың аталған командасы Мадрид қаласының «Атлетико» футбол клубымен сәуір айының 26-сы күні жасыл алаңда бақ сынасқан болатын. Ойын кезінде жанкүйерлердің бірі нанның бір бөлігін алаңға қарай лақтырып жібереді. Месут Өзіл нанды жерден көтеріп алып, маңдайына тигізіп, нанды сүйіп, адам аяғы баспайтын жерге қояды.