Үндістанда мұсылман әйел күйеуінің жедел пошта арқылы талақ айтқанынан кейін Жоғарғы сотқа жүгінді. Африн Рехман есімді 25 жастағы келіншек осыдан екі жыл бұрын ұзатылып, Джайпурда ата-енесімен бірге тұрып келген. Қалыңдықтың жасауына көңілдері толмаған отбасы үлкендері келіндерін шетқақпай ете берген көрінеді. «Мен төркіндеп кеткенімде күйеуімнің жедел пошта арқылы талақ айтқан хатын алдым»,- деді ол. Мұндай әділетсіздікке төзе алмаған ол жоғары сотқа шағымданған. Бұл жайында "IslamNews» порталы «Huffington Post India» ақпарат көзіне сілтеме жасай отырып, хабар таратты. Айта кету керек, кейінгі кезде аталған елде смс, әлеуметтік желі, телефон және пошта секілді байланыс құралдарымен ажырасуды талап етіп, талақ айту кеңінен тарай бастаған.