Соңғы уақытта Қырғызстанда әйелінен жәбір көрген және тұрмыстық зорлық-зомбылықтан зардап шеккен ер-азаматтар қарасы артып келеді. Бұл жайында айыр қалпақты ағайындардың «Кабар» ақпарат көзі қаңтар айының 17-і күні аталған елдің ішкі істер министрлігінің қоғамдық қауіпсіздік қызметінің жетекшісі Ұлан Рысбековке сілтеме жасай отырып хабар таратты. «Күйеуін ұратын әрі отбасы мүшелерін соққыға жығатын әйелдер бар. Олар ерін үйден қуып шығуға дейін барады»,- деп мәлімдеді құқық қорғау органының өкілі. Осылай дей келе ол өткен жылы әйелінен зардап шегуші ер-азаматтарды әйелдерінің ықтимал шабуылынан күзету үшін 393 ордер берілгенін мәлім етті.