Өзбекстан президенті Ислам Каримовтың үлкен қызы Гүлнәр Каримова АҚШ абақтысына жабылуы мүмкін. Гүлнәр Каримова мен оның жанында жүргендерге қарсы АҚШ-тың әділет министрлігі шағым түсірді. Бұл жайында "Islam-today» ақпарат көзі хабар таратты. Аталған құзырлы орын қызметкерлерінің айтуынша, Өзбекстан президентінің қызы қаржылық қылмысқа қатысқан. Ішінара айтқанда, АҚШ билігі одан Швейцария банктеріндегі үш шотта жатқан 555 млн долларды қайтаруды талап етіп отыр. АҚШ әділет министрлігі шенеуніктерінің сөзіне қарағанда, аса күрделі қаржылық операциялар мен сыбайлас жемқорлық арқылы ұрланған қаржы Гүлнәр Каримованың шотына түскен.