Таяуда Түркия, Катар, Пәкістан және Индонезия әскери техниканы бірлесіп өндіру және әскери дайындық, әскери зерттеулер мен әзірлемелер саласындағы ынтымақтастықты кеңейтуге негіз қалайтын стратегиялық маңызы бар келісімге қол қойды. Бұл жайында islam.kz порталы Мiddle Еast Еye ақпарат көзіне сілтеме жасай отырып мәлім етеді. Түркия әлемдегі қорғаныс өнеркәсібіндегі ірі ойыншылардың біріне айналды: түрік компаниялары жыл сайын миллиардтаған долларға әскери техниканы, соның ішінде дрондарды, әуе шабуылына қарсы қорғаныс жүйелерін және бронды техниканы шетелге экспорттайды. Түркия қорғаныс министрлігі 624 жылы Мұхаммед пайғамбар (Алланың сәлемі мен игілігі болсын!) мен оның ізбасарлары Араб түбегіндегі алғашқы ислам шайқастарының бірінде қарсыластарын ойсырата жеңген Бадр шайқасының құрметіне келісімге «Бадр мәмілесі» деген атау берілгенін мәлімдеді. «Бадр «толған айды» білдіреді – өйткені, қатысушы төрт ел осы пакті арқылы бірін-бірі толықтырады - елеулі әскери және экономикалық маңызға ие», - деп айтылған мәлімдемеде. Аталмыш келісімге қол қойған тараптар ең алдымен ұлттық қауіпсіздік аясында өз талаптарын анықтайтынын хабарлады. Әрбір елдің техникалық командаларынан тұратын «Атқарушы кеңес» одан кейін бірлескен өндіріс жоспарларын әзірлейді. Бұл жоспарлар өз кезегінде министрлерден, министрлердің орынбасарларынан және қорғаныс өнеркәсібі өкілдерінен тұратын «стратегиялық кеңеске» ұсынылатын болады. Бұл кеңес бірлескен өндірістік желілерге жол аша отырып, бюджеттер мен өндірістік алаңдар бойынша түпкілікті шешімдер қабылдайды. Катар бұл бастаманы қаржыландыруға және технологияны қолдауға міндеттеме алды. Осылайша Парсы шығанағы елдерінің әуе шабуылына қарсы қорғаныс саласындағы олқылықтарды жою бағытында тың қадам жасалды. Бірлескен өндірістік қуаттар өңірдің ең ауқымды қорғаныс өнеркәсіптік инфрақұрылымы орналасқан Түркияда шоғырлануы мүмкін.