Уағалейкумуссәләм уә рахматуллаһи уә бәракәтуһ!

Дінімізде үйленіп, үй болудың сауаптылығы мол. Дінде ол нәрсе «сүннет» амал ретінде саналып, әркімнің еркіндегі іс ретінде қаралса да, Пайғамбарымыз (с.а.у.) үйленудің абзалдығын баса айтып кеткен[1]. «Үйлену -иманның жартысы» деген де риуаят кездеседі дінімізде[2]. Демек, дінімізде үйлену – үйленбеуден абзалырақ. Алайда «үйленген адам мен бойдақтың құлшылығы арасында айырмашылық бар» деген ереже дінде жоқ.

Ал сіз сұрап отырған мәселеге келсек, ондай риуаяттардың кездесетіндігі рас. Оның кейбірінде «жетпіс рәкәғат намазынан артық...» делінсе, кейбір нұсқасында «сексен екі» делінеді. Бірақ олардың дені «сахих» риуаят еместігі деректерде айтылған. Не «тым әлсіз», не «жалған» хадистер. Мысалы, Ханбали ғұламасы, сүннит ғалымы Әбул Фәрәж ибн Жәузи (рахимаһуллаһ) өзінің «Жалған хадистер» атты жинағында, аталмыш риуаяттың сахаба Әнәс ибн Мәликке және сахаба Әбу Һурайраға тән етілетін екі нұсқасының барын айтады және ол екі нұсқаның екеуі де «жалған» хадистер қатарынан екендігіне назар аудартқан[3].

Сондықтан да, үйленген адамның намазы, үйленбеген адамның намазынан бірнеше есе артық деп ешкім кесіп айта алмасы анық. Мәселе – жүректің тақуалығында және ниетте. Кейде керісінше ықыласына қарай үйленбеген адамның оқыған намазы - үйленген адамның намазынан әлде қайда артық болуы мүмкін. Алла Тағала Құранда: «Алланың құзырында ең сыйлыларың – ең тақуаларың» деген[4].