Бисмилләһир рахманир рахим

Уағалейкумуссәләм уә рахматуллаһи уә бәракәтуһ!

Ханафи мәзхабы бойынша, сүйекке кірген адам мәйітті тегін жуғаны абзал. Мәйітті жуғаны үшін ақша алуына болмайды. Тіпті, егер жуатын басқа ешкім болмаса, ол ісі үшін ақша талап етуі күнә болады, өйткені жуатын басқа адам табылмағаны себепті «мәйітті жуу міндеті» оған уәжіп болып, оны ақысыз орындауы борышы. Пайғамбарымыз (с.а.у.): «Мұсылманның мұсылманда алты ақысы бар» деген. Соның бірі: «өлгенде денесін жуу» дейді¹. 

Тоқ етерін айтқанда, егер басқа жуатын адамдар табылып жатса, сізге ұсыныс жасалған уақытта, ақы сұрауыңызға болады, ал сізден басқа жуатын ешкім болмаса, ақы сұрауыңызға болмайды, ақысыз жууыңыз шарт². Өйткені, мәйітті жуу парыз кифая. Парыз кифаяны ақысыз орындау керек. Ханафи мәзхабынан өзге мәзхабтарда ақыға жууға болады.

Осы тұрғыда, халықтан ынсап кетіп, мүлдем мәйітті жуатын адам табылмаса, амал жоқ, ақыға жудыруға тура келеді.

Ең дұрысы - Аллаға мәлім! Әлхамдулилләһи Раббиль аләмин!

¹Имам Мәусули: «әл-Ихтияр - ғослуль мәйит. 1\91 
²Бәдруддин ал-Айни: «әл-Биная» - ғослуль мәйит. 3\94 бет; Имам әл-Кәсәни: «Бәдәиъ»;