Егер намазда әлгі жазуды көріп қана қоймай, сонымен қатар тілмен оқыған болсаңыз, намазыңыз бұзылады. Себебі, намазда оқылуы тиіс Құран аяттары мен дұғалардан тыс адам сөзін тілге келтіру  – намазды бұзады.

 Мұъауия ибн әл-Хәкәм әс-Сәләми атты сахабадан риуаят етілген бір хадисте, Пайғамбарымыз (с.а.у):«...Намазда адамның өз жанынан айтылған сөз болмауы керек. Шындығында намаз – Алланы пәктеу, Оны ұлықтау және Құран оқудан тұрады», – деген.[1]

Ал көрген жазуды тілге келтірмей, тек ойыңызша ғана оқыған болсаңыз, онда намаз бұзылмайды. Себебі, көңілдегі дүниелер намазды бұзбайды.

Бірақ, намазда бола тұра әдейі қандай да бір жазуға көңіл аудару – мәкруһ. Өйткені, намазға тұрған кісі «ифтитах тәкбірін» алғаннан кейін, барлық ықыласы мен көңілін намазға шоғырландыруға тырысуы керек. Өзге нәрселерге көңіл аудару ықыласты бұзады. Жаратушы Иеміз Құранда: «Оларға дінді тек Аллаға арнап, Ханифтер секілді Оған ықыласпен құлшылық ету... бұйрылды»[2], – дей келе құлшылығымызға ықылас білдіру керек екендігін бұйыруда.