Уағалейкумуссәләм уә рахматуллаһи уә бәракәтуһ!

Намаз оқып тұрғанда торғай немесе кептер секілді еті желінетін құстардың саңғырығы тисе, намазға зияны жоқ. Оған намаз бұзылмайды. Сөзімізге дәлел келтірер болсақ: 

«Егер, кептер, торғай сияқты еті желінетін құстың саңғырығы тисе, намазы не болады?» деген сұраққа, Имам Мұхаммед (рахимаһуллаһ): «Ол нәрсе себепті намазын қайта оқымайды» - деп жауап берген[1].

(فَإِن أَصَابَهُ خرء طَائِر يُؤْكَل لَحْمه مثل الْحمام والعصفور قَالَ لَيْسَ عَلَيْهِ فِي هَذَا إِعَادَة)

Ендеше, сіздің намазыңыз дұрыс. Торғай не кептердің саңғырығы түскені себепті намазыңыз бұзылмайды. Өйткені, торғай - еті желінетін құстар қатарынан. Оның саңғырығы таза үкімінде.

Мәлімет ретінде айта кетейін, Ханафи фиқһында құстар "саңғырығының нәжістігі" жөнінен екіге бөліп қарастырылады:

1. Саңғырығын ауада тастамайтын құстар.
2. Саңғырығын ауада ұшып жүріп тастайтын құстар.

Бірінші топтағы құстардың қағы (саңғырығын ауада тастамайтын құстардың қағы) – ауыр нәжіске жатады. Мысалы, тауық, қаз, үйрек т.б.

Екінші топтағылардың болса, яғни, ауада ұшып жүріп саңғырық тастайтын құстардың еті желінетіндерінің қағы – нәжіс емес, таза[2]. Мысалы, кептер, торғай, сауысқан т.б.

Ал, сұңқар, бүркіт, қаршыға сияқты еті желінбейтін, бірақ ауада ұшып жүріп саңғырығын тастайтын құстардың қағы – кей кітаптарда жеңіл нәжіске жатады дейді[3], кей кітаптарда олардың да қағы таза саналады делінген[4].

"Ендігі жерде, ит жаласа, намаз бұзыла ма?" – деген сауалыңызға келер болсақ, иттің сілекейі алақан ойығындай не одан көп мөлшерде болса, намаз бұзылады. Қайта оқыған дұрыс. Ал одан аз мөлшерде болса, намаз бұзылмайды. 

Ең дұрысы - Аллаға мәлім!