Моншаның шомылуға арналмаған таза бөлмелерінде намаз оқуға болады, тіпті орын болмай жатса, киім шешетін жерінде уақыты кірген намазын оқып алған абзал. Ханафи ғалымдарының кейбірі моншада намаз оқуды мәкруһ санағанымен, моншаның таза жерінде намаз оқып алуды мубах санағандар да бар, бастысы – таза орын және түрлі бейнелерден ада болмағы ләзім.

Бұған қатысты Ханафи фиқһ кітаптарында былай делінеді:

«Моншада намаз оқуға келер болсақ, егер моншада суреттер ілініп тұрса, намаз оқу мәкруһ. Сурет болмаса, таза жерінде намаз оқу мәкруһ емес. Айтушыларға қарағанда Бұхараның ғалымдары моншада намаз оқитын болған екен және жамағатпен оқитын болған»¹.