Уағалейкумсалам! Ханафи мәзһабы бойынша нәрестенің де зәрі нәжіс үкімінде[1]. Пайғамбарымыз (с.а.у.) «Зәрден сақтаныңдар...!», - дей келе жалпылама зәр атауынан сақтануды бұйыруда. Сол себепті сәби де болса, дәретін сындырған суды ауыстырған дұрыс. Өйткені тұрғын суға және аз суға түскен нәжіс суды кірлетеді.

Сәбидің зәрі де нәжіс екендігін өзге де риуаяттардан байқауға болады. Атап айтсақ, Сахих Муслим атты хадис кітабінда келтірілген риуаятта Айша анамыз былай дейді:

«Пайғамбарымызға емшектегі сәбиді алып келген еді. (Сәбиді Пайғамбарымыз құшағына алғанда) Ол сәби Алла елшісінің құшағына дәретін сындырып қояды. Пайғамбарымыз су сұратып, сол зәр тиген жерге суды төкті»[2].

Сахих Муслимде келген тағы бір риуаятта мүхәжир әйелдердің бірі Үмму Қайс бинт Михсан өзінің тамақ ішу уақытына жетпеген сәбиімен Пайғамбарымызға келеді. Әлгі сәби Алла елшісінің құшағына дәретін сындырып қояды. Пайғамбарымыз су сұратып, зәрі тиген жерге су құйып, аздап жуады[3].

Осы хадистегі «وَلَمْ يَغْسِلْهُ غَسْلًا» сөйлемін Ханафи ғалымдары «қатты жумай аздап жуды» деп түсіндірген. Себебі ондағы «ғаслән» сөзі алдындағы етістікке күшейтпелі мағына беру үшін келеді. Сонда мағынасы: «Қатты жумай, аздап жуды» дегенге саяды.