Экономикасының негізгі таянышы болып табылатын Мысырдың туризм саласы соңғы жылдары елдегі түрлі толқулар мен қақтығыстар салдарынан, яғни, саяси дағдарыстан ақсап қалғандықтан Мысыр билігі туристерді көптеп тарту үшін түрлі жобаларды қолға алып жатыр. Солардың бірі – орта ғасырларда орын алған жойқын зілзаладан су астында қалып қойған Александрия жәдігерлерін жұртшылықтың назарына ұсыну. Көне жәдігерлерді құрлыққа алып шығу мүмкін болмағандықтан су астынан мұражай ашуды жоспарлап отыр. Алты метр тереңдікті қамтитын аталмыш жобаны жүзеге асыруға 150 млн доллар қаражат жұмсалады. Бұл жобаның авторы – Жак Ружери есімді француз сәулетшісі. Егер бұл жоба сәтті жүзеге асырылатын болса, су астындағы жәдігерлерді жылына 3 млн турист тамашалауы мүмкін.