Голланд ғалымдары әлемдегі ең мінсіз шоколадтың құрылымын 3D-басып шығарудың жаңа әдісімен жобалауды үйренді. Бұл жайында islam.kz порталы pubs.rsc.org ақпарат көзіне сілтеме жасай отырып мәлім етеді. Тістегенде ыдырап кететін шоколадты жасау үшін алдымен кристалдық тор құрылымын жасау қажет, ол үшін эмулсияны қыздырады және салқындатады. Ричард Танго-Лоуи есімді физик әрі шоколад дүкені қожайынының айтуынша, какао майы алты фазалы полиморфты кристалл болып табылады. Оның мінсіз деп атауға болатын V фазасы бар: ауызға салғанда алдымен қыртылдап, артынан ериді әрі уатылып шашылып кетпейді. Ол, сондай-ақ, жоғары сапалы шоколадтарға жылтыраған өң береді. Десе де мұндай шоколадтың бір тілімін кристалдау үшін бір апта уақыт кетуі мүмкін. Бұдан бөлек, V фазасының кристалы тұрақсыз болып келеді әрі уақыт өте келе IV фазасының көмескі кристалына айналады. Тұтынушылардың дені шоколадты тістеген кезде қытырлағанын жақсы көреді. Сол себепті, ғалымдар бұған спиралдың көмектесетінін байқаған. Содан кейін ғалымдар бір бағытта сындырған кезде мықтылығы сақталатын, бірақ, қарама-қарсы бағытта сынғыш және қытырлайтын құрылымдарға қол жеткізу үшін анизотропты құрылымдармен тәжірибе жасауға көшті. Анизотропты зерттеу бір осіне күш түскенде беріктік танытатын, ал екіншісіне күш түсіргенде қытырлайтын шоколадтарды жасауға бағытталған. Ол үшін ғалымдар 3D принтерді пайдалана отырып, өнімді басып шығаруды ұйғарды. Ол V фазалық кристалдардың түзілуін барынша арттыру үшін белгілі бір деңгейде «шыңдалған» еді. Ол үшін шоколадты барлық кристалдарды жою үшін 45 ° C-қа дейін қыздырды. Содан кейін температура 34 ° C-тан төмен түскенше қатты түйіршіктермен суытып, артынан шоколадты шприцтерге салып, оларды 3D биоплоттердің картридждеріне орналастырды. Осылардан соң жасалған пішінді 12 °C температурада арнайы негізде басып шығаруға талпынды. Бұл тарапта ғалымдар күтпеген жерден қиындыққа тап болды: шоколад шприц түтігінде кристалдана бастағандықтан басып шығарылған сызықтардың қалыңдығы өзгерген кезде машинаны үнемі қайта калибрлеуге тура келді. Ол, сондай-ақ, басып шығару процесінде қалыңдап кететін еді, сондықтан әр қабаты басып шығарылған сайын қысым мен жылдамдықты реттеп отыруға тура келген. Ғалымдар алдағы уақытта бұл проблеманы еңсеру бағытында жұмыс істейтінін жеткізді.