Абу Лейс аш-Самарқанди (Алла оған разы болсын) былай дейді:

«Он түрлі қасиет адамды ең қайырлы жандардың мәртебесіне жеткізіп, биік дәрежелерге көтереді:

• Жомарттық – садақаны көп беру.

• Құранға құштарлық – Құранды жиі оқып, сөзіне құлақ асу.

• Жақсы орта табу – Ақыретті еске салып, дүние қуудан тыйғызатын ізгі жандармен бірге болу.

• Бауырластық пен туыстықты сақтау – ағайын-туыспен қарым-қатынасты үзбей, сілә-рахим жасау.

• Науқастың көңілін сұрау – сырқаттанып жатқан бауырдың жағдайын білу.

• Дүниеге мастанғандардан аулақ болу – байлығы басын айналдырып, Ақыретін ұмытқан дәулеттілермен шамадан тыс араласпау.

• Пікірлеу (тәфаккур) – ертеңгі күні өзінің қандай күйге түсетінін, Ақыреттегі жағдайын жиі ойлау.

• Дүниеге тым байланбау – бос қиялға салынбай, өлімді жиі еске алу.

• Аз сөзділік – аз сөйлеп, тілге ие болу, артық сөзден тыйылу.

• Кішіпейілділік пен қарапайымдылық – қарапайым киіну, кедей-кепшікті жақсы көріп, олармен араласу, жетім мен міскінге жақын болып, олардың басынан сипап, қамқорлық көрсету.»