Әзіреті Омар Пайғамбарымызды (с.а.у.) көргенде неге жылады?
Әзіреті Омар Пайғамбарымызды (с.а.у.) көргенде неге жылады?
18 күн бұрын 2874
А. Қасым

Күндердің бірінде арада түсініспеушіліктер туындап Пайғамбарымыз (с.а.у.) жұбайларына ренжиді де, олардың үйлеріне бір ай кірмеуге серт береді. Халық арасында "Пайғамбарымыз жұбайларының басын босатты" деген күңку сөздер тарай бастайды. Мұны естіген Әзіреті Омар (р.а.) анық-қанығын білу үшін, алдымен Әзіреті Айша анамызға барып, Алла елшісін (с.а.у.) ренжіткендері дұрыс болмағанын айтады. Одан шығып, өзінің қызы әрі Пайғамбарымыздың жұбайы Хафса анамызға барады. Оған да Пайғамбарды ренжіткендерінің дұрыс болмағандығын айтып, қызына ұрысады. Хафса анамыз әкесінің насихат сөздеріне шыдай алмай өкініп жылайды. Әзіреті Омар Пайғамбарымыздың қайда екендігін сұрағанда, Хафса анамыз Оның (с.а.у.) отырған оңаша бір бөлмелік панасын көрсетеді (биіктеу орналасқан, асхана тәріздес, ішім-жем сақталатын бір бөлме). Барса, бөлмесінің сыртында Рабах есімді қызметші жігіт отыр екен. Кіруге рұқсат сұрайды. Алғашында Алла елшісі ыңғай танытпайды. Үшінші мәрте кіруге рұқсат сұрағанда Пайғамбарымыз ишара жасап, кіруге рұқсат береді.

Кірсе Алла елшісі (с.а.у.) құрманың бұтақтарынан тоқылған төсеніште жатыр екен. Денесінің белден жоғарғы жағында киім жоқ, белден төменгі жағына изар киген. Әзіреті Омарды көргенен кейін басын көтеріп изарын жоғарырек тартады.

Астындағы шиден тоқылған төсеніш Пайғамбарымыздың (с.а.у.) мүбарак денесіне батып, бір жағына шидің ізі қалып қойыпты» - дейді Әзіреті Омар. - Жанына отырып, Алла елшісінің бөлмесіне көз жүгіртіп қарадым. Бөлмесінде бір саъ мөлшеріндей ғана бір уыс тары бар екен (2-3 кг). Бөлменің бір шетінде «Құраз» ағашының бұтағы тұр.  Илеуі толық бітпеген бір тері ілініп тұр. (Пайғамбарымыздың жағдайын көріп, көңілім босап) Екі көзімнен жас ақты.

Көзімдегі жасты көрген Алла елшісі (с.а.у.) менен:

-Уа, Хаттаб ұлы! Сені жылатқан не нәрсе? – деп сұрады.

Мен:

-Уа, Расулалла, жыламай қайтейін. Мына ши төсеніш денеңізге батып кетіпті. Бөлмеңіздің жайы мынау – ішінде көріп тұрғандардан басқа еш нәрсе жоқ. Рим патшасы Қайсар (Цезарь) мен парсы патшасы Кисра анау  – (астарынан) өзендер ағып, жеміс-жидектер (жеп, шалқуда). Сіз болсаңыз – Алланың пайғамбары, әрі оның таңдаулы пендесі бола тұра, тұрып жатқан бөлмеңіздің халі көңіл қоңшытарлық емес, – дедім (жылауымның себебін айтып).

Сонда Алла елшісі (с.а.у.) маған:

- Уа, Хаттаб ұлы! Ақырет бізге болып, ал дүние оларға болуына разы емессің бе? – деді" дейді Әзіреті Омар (яғни, бізге ақырет жетеді, дүние соларға-ақ бола берсін).

Одан соң, Әзіреті Омар Пайғамбарға халық арасында тарап жатқан әңгіменің жай-жапсарларынан хабардар етеді. Бірақ, Оның (с.а.у.) өз әйелдеріне талақ бермегенін білгеннен кейін Әзіреті Омар ол жайында халыққа жариялауға рұқсат сұрайды. Пайғамбар рұқсат бергеннен соң Әзіреті Омар мешіттің кіре берісінде тұрып: "Пайғамбар өз жұбайларына талақ бермеді" деп айқайлап, жұртты құлағдар етеді. Пайғамбарымыздың (с.а.у.) серт еткен бір айлық күні де аяқталып қалған болатын[1].

 islam.kz.

[1] «Сахих Мүслім». Хадис ықшамдап алынды.

0 пікір