БАЛАҒА ҚАНДАЙ ЖӘРДЕМАҚЫ БЕРІЛЕДІ?
|
Назарларыңызға «Кәмелетке толмаған адамға қандай ықпал ету шаралары тағайындалуы мүмкін», «Ата-ана қандай жағдайларда ата-ана құқығынан айырылады?», «Мемлекет бала тәрбиелеп отырған отбасыларға қандай қолдау көрсетеді?» деген секілді еліміздің әрбір азаматына пайдалы құқықтық кеңестерді ұсынамыз.
Қылмыстық құқықбұзушылық жасаған кәмелетке толмаған адамдарға жаза тағайындалуы немесе оларға мәжбүрлі-тәрбиелік ықпал ету шаралары қолданылуы мүмкін деп көрсетіледі «Прокурордың 100 кеңесі» құқықтық анықтамаларында. Сот мынадай мәжбүрлі-тәрбиелік ықпал ету шараларын тағайындауы мүмкін:
– ескерту;
– ата-анасының немесе олардың орнын басатын адамдардың не мамандандырылған мемлекеттік органның қадағалуына беру;
– келтірілген зиянның орнын толтыру мүмкіндігін жүктеу (бүлінген мүлікті қалпына келтіру, ұрланған мүлікті қайтару, ақшалай өтемақы төлеу, дәрі-дәрмек санаторлық-курорттық жолдамалар сатып әперу және т.б.);
– кәмелетке толмаған адамның демалыс уақытын шектеу және оның мінез-құлқына ерекше талаптар белгілеу;
– ерекше режимде ұсталатын білім беру ұйымына орналастыру;
– жәбірленушіден кешірім сұрау міндетін жүктеу (кәмелетке толмаған адам жәбірленушіге келтірілген зиян үшін өз атынан одан кешірім сұрайды);
– бір жылға дейінгі мерзімге пробациялық бақылау белгілеу (уәкілетті мемлекеттік орган жүзеге асырады және сот шешімі бойынша көзделген міндеттерді орындау кіреді).
Бірнеше мәжбүрлеп тәрбиелік ықпал ету шаралары бір мезгілде тағайындалуы мүмкін. Кәмелетке толмаған адам мәжбүрлеп тәрбиелік ықпал ету шарасын бір жыл ішінде екі және одан да көп рет қасақана орындамаған жағдайда, мамандандырылған мемлекеттік органның ұсынымы бойынша сот бұл шараның күшін жояды және егер қылмыстық жауаптылыққа тарту мерзімі өтіп кетпесе, материалдар кәмелетке толмаған адамды оны қылмыстық жауаптылыққа тарту үшін жіберіледі.
Егер қылмыстық құқықбұзушылық
жасаған күннен бастап мынадай мерзім-дер өтіп кетсе, адам ол қылмыстық жауаптылықтан босатылады:
– қылмыстық теріс қылық жасағаннан кейін бір жыл;
– онша ауыр емес қылмыс жасағаннан кейін екі жыл;
– ауырлығы орташа қылмыс жасағаннан кейін бес жыл;
– ауыр қылмыс жасағаннан кейін он бес жыл;
– аса ауыр қылмыс жасағаннан кейін жиырма жыл.
Бұл ретте кәмелетке толмаған адамды қылмыстық жауаптылықтан немесе жазаны өтеуден босату кезінде бұл мерзімдер жартылай қысқарады деп ескертеді заңгерлер.
Қазіргі кезде ата-ана құқығынан айыру деректері көп кездеседі. Ата-ана ата-аналық құқығынан келесі жағдайларда айырылады деген мәселеге келгенде көпшілігіміз біле бермейтін сұрақтар туындайды. Бұл мәселеге қатысты мынаны білуіміз керек:
– ата-ана міндетін орындаудан жалтарса, оның ішінде алимент төлеуден қасақана жалтарса;
– дәлелді себептерсіз өз баласын перзентханадан (перзентхана бөлімшесінен), жетім балаларға, ата-анасының қамқорлығынсыз қалған балаларға арналған ұйымдардан және тағы басқа ұйымдардан алудан бас тартса;
– өздерінің ата-аналық құқықтарын теріс пайдаланса (мысалы, баланы оқытуға қасақана кедергілер келтірсе; балаларын қайыршылыққа немесе ұрлықшылыққа баулыса; баланы жезөкшелікпен айналысуға итермелесе; балаларды спирттік ішімдіктер немесе есірткі тұтынуға тартса);
– балаларына қатал қараса, оларға физикалық немесе психикалық зорлық-зомбылық көрсетсе, оны жыныстық қылмысқа итермелесе;
– спирттік ішімдіктерді немесе есірткі құралдарын, психотроптық заттарды және (немесе) соның аналогтарын пайдаланса. Ата-ана өз баласының, жұбайының немесе отбасының басқа мүшелерінің өміріне немесе денсаулығына қарсы қасақана қылмыстық құқықбұзушылық жасаған кезде, ата-аналық құқығынан айырылады. Ата-аналық құқығынан айыру сот тәртібінде, прокурордың және қорғаншылық немесе қамқоршылық қызметімен айналысатын мекеменің қатысуымен жүргізіледі.
Әрбір ата-ана білуі тиіс, әрбір отбасы үшін маңызы бар мына заң актілерінен де хабардар болған дұрыс. Мемлекет Қазақстан Республикасының заңнамасында белгіленген тәртіпте әлеуметтік көмек беру арқылы, бала тәрбиелеп отырған отбасыларға көмек көрсетеді. Мұндай отбасылар мынадай мемлекеттік жәрдемақылар ала алады:
Бала тууға байланысты төленетін бір жолғы жәрдемақы (бұдан әрі – бала туу жәрдемақысы). Бала туу жәрдемақысы (айлық есептік көрсеткіштің (бұдан әрі – АЕК) өзгеруін ескеріп) мынадай мөлшерде белгіленген: бірінші, екінші, үшінші балаға – 31,41 АЕК; төртінші және одан кейінгі балаларға – 52,35 АЕК.
Бала 1 жасқа толғанға дейін бала күтіміне байланысты төленетін ай сайынғы мемлекеттiк жәрдемақы (бұдан әрі – бала күту жәрдемақысы). Бала күтімі жәрдемақысы мынадай мөлшерде белгіленген: бірінші балаға – 5,76 АЕК; екінші балаға – 6,81 АЕК; үшінші балаға – 7,85 АЕК; төртінші және одан кейінгі балаларға – 8,90 АЕК.
18 жасқа дейінгі балаларға төленетін айы сайынғы мемлекеттік жәрдемақы (бұдан әрі-бала жәрдемақысы). Бала жәрдемақысы әрбір балаға 1,05 АЕК мөлшерінде белгіленген (01.01.2018 ж. бастап қолданысқа енгізіледі). Мүгедек бала (мүгедек балалар) тәрбиелеп отырған анаға немесе әкеге, асырап алушыға, қорғаншыға (қамқоршыға) тағайындалатын ай сайынғы мемлекеттік жәрдемақы. Бұл жәрдемақы 1,05 ең төменгі жалақы мөлшерінде белгіленген. Бала туу немесе бала күтімі жәрдемақысын тағайындауға жүгіну мерзімдері бала туған күннен бастап он екі айдан аспайды.
Патронаттық тәрбиешілерге берген баланы (балаларды) асырауға мынадай мөлшерлерде ай сайынғы төлем жүргізіледі: мектеп жасына дейінгі бір балаға тамақтану – 6 АЕК; мектеп жасындағы бір балаға тамақтану – 7 АЕК; бір балаға киім, аяқкиім, жұмсақ керек-жарақ – 3 АЕК. Жетім бала (жетім балалар) мен ата-анасының қамқорлығынсыз қалған баланы (балаларды) асыруға қорғаншыларға немесе қамқоршыларға төленетін төлемнің мөлшері айына 10 АЕК-ті құрайды. Жетім баланы және (немесе) ата-анасының қамқорлығынсыз қалған баланы асырап алуға байланысты, бір жолғы ақшалай төлем төленеді, оның мөлшері 75 АЕК-ті құрайды.
Газеттің келесі нөмірінде «Алимент бойынша борышкер болсаңыз…», «Бала асырап алғыңыз келсе…», «Баланы балабақшаға қалай орналастырып, балалар лагеріне жолдаманы қалай алу керек?» деген мәселелер бойынша прокурор кеңестерін беретін боламыз.