Бисмилләһир рахманир рахим

Сақтандыру компанияларының жүйесі «ғарарға» (ықтималдылыққа) сүйенетіндіктен, Исламда харам болып есептеледі. Бұл жайында Халықаралық Фиқһ кеңесінің қабылдаған қаулысында былай делінген:

«Сақтандыру компаниялары қолданатын тұрақты жарнаға (құн төлеміне) негізделген коммерциялық сақтандыру келісімі «үлкен ғарарға» негізделген, ол болса  - келісімшарттың дұрыс болуына кедергі келтіреді, сондықтан ол (сақтандыру) шариғи тұрғыда харам болып есептеледі».¹

Сондықтан да, шариғатта дін мамандарының көзқарасы бойынша, қазіргі таңдағы Ислами емес сақтандыру компанияларында жұмыс істеуге болмайды, себебі ондай компания – өсімді, ғарарды (ықтималдылық) қамтиды. Тек өзге жұмыс табылмай қиналғанда уақытша істей тұрса болады дейтін ғалымдар да жоқ емес. Өйткені, Алла Тағала былай деген: «Мәжбүр болған болсаңдар ол басқа»^2. Ең дұрысы – Аллаға мәлім! Әлхамдулилләһи Раббиль аләмин!