Уағалейкумуссалам, Қанат! Егер адам ораза кезінде тіс жұлдыртатын болса, онда оның оразасы бұзылмайды. Тіс жұлғаннан кейінгі аққан қанның ішке кетіп қалмауын байқау керек. Егер тісінен аққан қанды жұтып қойған жағдайда тек сол күнгі оразаның қазасын өтейді[1].

Ал «тіс жұлғанда ине салса, ораза бұзыла ма?» дегенге келер болсақ, Имам Юсуф пен Имам Мұхаммәдтің (р.а.) тұжырымы бойынша «денедегі және бастағы «терең жараны» сұйық дәрімен емдесе де, ораза бұзылмайды. Себебі, дәрі ішке (азық секілді) табиғи жолдармен бармағандықтан, ішке түсуі екіталай»[2] дей отырып, ішке бір заттың табиғи жолдардан (ауыз, құлақ, мұрын, тік ішек) басқа жолдармен баруы оразаны бұзбайды деген. Ендеше тіс емдер кезде салынатын ине де, «табиғи емес» жол арқылы, дәлірек айтқанда иекке салынатындықтан  оразаны бұзбайды деуге негіз бар. Өйткені иекке және тамырға салынатын дәрі ішке және асқазанға бармайды. Бастысы иекке салынған дәрінің қалдығы жұтылып кетпеген болу керек. Ауызға укол салу барысында немесе ауызды шаю барысында абайсызда жұтылса, ораза бұзылады, бір күн қазасын өтеу керек, кәффарат керек емес.

Абдусамат Қасым

[1] Ибн Ғабидин – 3/368 бет.
[2] Әл-Кәсәни, Бадаиғ – 2/607 бет.