Уағалейкум әссәләм уа рахматуллаһи уә бәракәтуһ!

Емізулі баласы бар əйел адамға ораза тұтпауына рұқсат етілген. Бұған қатысты сахаба Әнәс бин Мәликтен риуаят етілген хадисте Пайғамбарымыз (с.а.у): «...Күмәнсіз Алла тағала сапардағы адамның намазын жартыға қысқартты. Және оразаны оған (жолаушыға) және жүкті әйел мен емізулі әйелге міндеттемеді...», - деді. (Ибн Мәжә – 1667.).

Дегенмен, бұл – омыраудағы баласына немесе іштегі балаға оразаның залалы тиеді деп қауіптенген жанға қатысты.

Ал, ауыз бекітсе де сәбиі тоярлықтай сүті азаймайтын ана ораза ұстауы тиіс. Алда-жалда, сүті тартылып, сәбиге зияны тиіп жатса, немесе өзі сырқаттанып, ауыз бекітуі қиындаса ораза ұстамауына рұқсат. Бірақ, алдағы уақыттарда (Рамазаннан кейінгі уақыттарда) жіберіп алған оразасының қазасын өтейді. (Әл-Кәсәни, Бадаиғ – 2/614 бет.).

Осы орайда айта кетелік: ауызы берік бола тұра баласын емізген ананың оразасы бұзылмайды.