Уағалейкумуссәләм уә рахматуллаһи уә бәракәтуһ!

Қағба тасқа қарап намаз оқуымыздың ең басты себебі - Алланың бұйрығы. Алла Тағала барша мұсылмандарға намазға тұрғанда жүзімізді Мекке қаласында орналасқан әл-Харам мешітіне қаратуымызды бұйырған[1]. Сондықтан да мұсылмандар намазды құбылаға, Мекке тарапына қарап оқиды.

Екінші себебі, Меккедегі мешіт – жер бетіндегі ең алғашқы құрылған мешіт. Оның өзге мешіттерден сауап тұрғысынан да, берекелі болуы тұрғысынан да дәрежесі жоғары. "Әли Имран" сүресінде былай делінген: «Шынында адамзат үшін алғаш құрылған (Алланың) үйі – Меккедегі (бәйтулла). Оны бүкіл әлемге береке әрі хидаят еттік»[2].  

Үшінші себебі – жер бетіндегі мешіттер адамдардың таңдауымен соғылған болса, Меккедегі мешіттің құрылуын Алла Тағаланың өзі қалаған. Ол мешіт - Жаратушының таңдауы. Сол себепті, ол барлық мешіттердің құбыласы.

Ал, барлық мұсылмандардың бір жерге беттеуінің мәні неде? десеңіз, оның да өзіндік мән-мағыналары бар.  

Біріншіден, Құдай - біреу. Бәріміз бір Аллаға табынамыз. Сондықтан да, бәрінің жүзі бір бағытқа қарауы керек.

Екіншіден, намаз, тек рухани азық қана емес, ол – мұсылмандар арасында ұйымшылдықтың және бірлік пен бауырмалдықтың ұйытқысы. Бүкіл мұсылмандардың бір жаққа қарап құлшылық етулері адамдар арасында бірлікті тудырады.

Үшіншіден, құбылаға беттеу - барлық мұсылмандардың бір тұсқа қарауды қамтамасыз етеді. Мысалы, мешітте әркім әр тарапқа қарап оқитын болса, жамағатпен намаз оқудың мәнісі қалмас еді. 

Осы орайда, мұсылмандардың құбылаға беттеуі – кағба тасқа табыну емес, Алланың бұйырған бағытына қарай беттеп құлшылық жасау.