Уағалейкумуссәләм!

Мархұмның атынан қажылық парызын өтеген жағдайда, мархұмның мойнынан парыз түседі, сауабы да мархұмға жазылады.

Мархұмның атынан қажылық парызын өтейтін кісі:

1. Миқат аумағында ихрамға кірерде «мархұмның» атынан қажылық парызын орындауды айтып былай дейді: «Пәленше ұлы Түгеншенің атынан қажылық парызын өтеу ниетімен ихрам кидім, ләббәйкаллаһумма ләббәйк!» дейді.
2. Ихрамға кіргеннен кейін екі рәкәғат намаз оқып, былай деп ниет етеді: «Аллаһым! Пәленшенің атынан қажылық парызын өтеуді ниет еттім, оны маған жеңілдет және оны менен әрі пәленшенің атынан қабыл ете гөр» дейді¹.

Мархұмның атынан қажылық өтеуге болады дегенге қатысты мынадай бір сахих хадисті дәлел ретінде келтіруге болады: 

"Жүһәйне тайпасынан бір әйел Пайғамбарымызға (с.а.у.) келіп: "Анам қажылық жасаймын деп атаған еді (нәзір), алайда қажылық жасамай тұрып қайтыс болып кетті. Оның орнына қажылық қылсам бола ма?" деп сұрады. Сонда Алла елшісі (с.а.у.) оған: "Иә, оның атынан қажылық жаса. Ойлашы, анаңның өтелмеген дүниелік қарызы болғанда, оны өтерме едің? (Бұл да сол сияқты). Алланың қарызын өтеңдер. Алла қарызын өтеуге лайықтырақ!" деді2.