Уағалейкум әссәләм уә рахматуллаһи уә бәракәтуһ!

Сіз айтып отырған талақ «мұғаллақ талақ» үкімінде деген ойдамыз. Мұғаллақ талақ дегеніміз - болашақтағы бір істің жүзеге асуына байланыстырылып айтылған талақ. «Мұғаллақ талақта ниет маңызды» дейтін Ислам ғұламалары бар[1]. Осы пәтуаға қарағанда, досыңыз пәлен үйге барудан тек тыю және қаймықтыру мақсатында айтқан болса, онысы талақ болып саналмайды.

Бірақ, жұбайы сол үйге барған жағдайда «анттың кәффәратын» өтейді[2]. Ең дұрысы - Аллаға мәлім! 

Ескерту: 

Талақ сөзі - жұбайын үркіту үшін, қорқыту үшін қолданатын құрал емес. Талақ - Шариғи заң. Ол - Исламдағы неке және отбасы заңнамасында қарастырылатын нормативтік-құқықтық жүйе. Бұл жүйе - бүкіл әлемді жоқтан бар еткен, құдіреті шексіз Жаратушының кәләміна (сөз) және Оның елшісі Мұхаммед пайғамбардың хадис-шәрифтеріне сүйенеді. Сондықтан да, оған жеңіл қарау - қателік. Ал, текке талақ айту - Жасағанға жақпайтын әрекет. Сол себепті, онсызда "үшеуге" шектелген "талақ айту" құқын босқа сарп қылып, шайтанға ергенше, ақылға келіп, сауапқа кенелген артық. Осы орайда, "еркек - бас, әйел - мойын" демекші, әйелі де ерінің ашуын тудыратын іс-қимылдардан барынша ұзақ жүргені дұрыс. «Күйеуі разы болған халде о дүниеге аттанған әйел пейішке кіреді» - дейді Пайғамбарымыз!