Уағалейкумуссалам уә рахматуллаһи уә бәрәкәтуһу! Шырын ханым, Ханафи мәзһабы бойынша, қыздың үйленгісі келген жігіті: біріншіден қыздың тегіне сай; екіншіден, мәһірін беріп болашақта нәпәқамен қамтамасыз ете алатын; үшіншіден, қыздың «діні» мен «тақуалығына» сәйкес жігіт болғаны жөн[1]. Өйткені ардақты Пайғамбарымыз (с.а.у) бұл жайында: «Әйелдерді тек теңіне үйлендіріңдер...»[2], - деген. Теңіне шықпаған жағдайда, қызға тиер зиянның алдын алу мақсатында, оның қамқоршысы некенін бұзылуын соттан талап ете алады[3].

Ендеше, дініне берік сіз секілді қыздың мүмкіндігінше, келешекте материалдық жағымен қоса рухани жағынан да сүйеніш болар жар таңдауы ләзім. Намаз оқымайтын жігіт өзімен қоймай, сізді де намаздан суытуы мүмкін. Өйткені Пайғамбарымыз (с.а.у.) өзінің асыл сөзінің бірінде: "ٌКісі - досының дінінде. Әркім кіммен жолдастық құрып жүргеніне қарасын", - деп өсиет еткен[4].  Әйтсе де, соңғы шешім өзіңізде.