Ханафи ғұламаларының айтуы бойынша, балық пішіндес емес, балық атаулыға жатпайтын су жануарларының еті халал емес. Сондықтан да, ат балық (морские коньки), су шошқасы, су шаяны т.б. жеуге болмайды. Бірақ, жылан балықтың еті халал[1].  Және шортан балығы да балық тәріздес су хайуаны болғандықтан, оның  да еті адал деуге негіз бар.

Жайын балығына келер болсақ (майдасын лақа дейді), сахаба Абдулла ибн Аббастың: «...Жайынды (арапшасы جِرّيّ - әл-жиррии) яхуди дініндегілер жемейді. Ал біз жейміз», - дегендігі хадис кітаптарында келтірілген[2].

Ханафи ғұламасы Имам Сарахси өзінің атақты фиқһ кітабында жылан балығы мен жайын жайында былай дейді: 

[جَمِيعُ أَنْوَاعِ السَّمَكِ حَلَالٌ؛ الْجِرِّيثُ وَالْمَارِهِيجُ وَغَيْرُهُ فِي ذَلِكَ سَوَاءٌ]

"Барлық балық түрлері халал. (Мысалы): Жайын балығы, жылан балығы және басқа (балық тектестер) - халал мәселесінде теңдей"[3].  

(الْجِرِّيثُ (жиррис) - жылан балықты да білдіреді, кей анықтамаларда оның "жайын" екендігі айтылған. وَالْمَارِهِيجُ (мәриһиж) - фариси бір сөз, жылан балық деген ұғымда).

Ханафи мәзхабынан өзге мәзхабтар су хайуандарынан жасалған өнім түрлерінің шеңберін кең алған. Мысалы, Шафиғи мәзхабында, құрбақа мен қолтырауыннан басқа су хайуандарының көпшілігі - адал. Балық тәріздес болуы шарт емес. Мәлики мәзхабы мен Ханбали мәзхабында да үкімі осы[3].