Уағалейкумуссәләм уә рахматуллаһи уә бәракәтуһ!

Хадисте Алла елшісі (с.а.у.) былай деген:

«Лә иләһә иллаллаһ» дегендердің (жаназа) намазын оқыңдар.  Сондай-ақ «лә иләһә иллаллаһ» дегендердің артында ұйып намаз оқыңдар»[1].

Ендеше, өмірін суицидпен аяқтаған мұсылманның жаназасы оқылады. Риуаяттарға қарағанда Пайғамбарымыз (с.а.у.) өз-өзін өлтіргеннің жаназасына байланысты: «мен оған жаназа оқымаймын» деп жаназасына қатыспағанымен, өзге сахабаларды одан тыймаған.

Дейтұрғанмен, өз-өзіне қол салып, өз-өзін өлтірудің ауыр күнә екендігін естен шығармау керек. Исламда адамның жаны - Алланың берген аманаты. Басқаның жанын қию қандай ауыр күнә болса, өзінің жанын қию да сондай ауыр күнә. Оның о дүниедегі жағдайы мүшкіл. Пайғамбарымыз (с.а.у.) бір сөзінде былай деп қатаң ескертеді:

«Кімде-кім,  өз-өзін таудың төбесінен тастап суицид жасаса, ол адам өзін мәңгі қалатын тозақ отына жоғарыдан лақтырған болады.  Кімде-кім, өзін у ішіп өлтірсе, мәңгі-бақи  тозақ отында қолындағы уын жұтатын болады. Кімде-кім, өзін кесетін өткір бір затпен өлтірген болса, ол тозақта мәңгі бақи қолындағы кескен затымен қарнын тілетін болады»[2] .  

Алла Тағала баршамызға тәуфиқ-һидаят бергей!