ҚАРАҒАНДЫ: БЕС БІРДЕЙ КӘСІПОРЫН СЕРТИФИКАТТАЛДЫ 

Қарағанды облысындағы бес бірдей кәсіпорын: "MEDIEVA SUSHI & PIZZA" фаст-фуд өнімдері, "Halva" дәмханасы, "Firdaus" мейрамханасы, "Тай" шұжық өнімдері, «HANI BRUNCH» кондитерлік өнімдері "QMDB Halal" сертификатына ие болды. Сертификатты "Халал Дамудың" Қарағанды облысы бойынша жауапты өкілі Ысқақ Абдрахманов пен технолог Айзат Сатаева табыстады.

"Алла Тағала қасиетті Құранда: «Уа, адамдар! Таза (адал) нәрселерден жеңдер және ізгі амал істеңдер...», – деген. Дастарханымызда ұсынған тағамымыз бен ішкен асымыздың адал болуы – халал кәсіпорындар қызметіне тікелей байланысты. Бүгінгі күні өңір бойынша сертификатталған 50-ге жуық кәсіпорын бар. Олардың өндірісі, дайын өнімдерінің таза әрі адал болуы, шариғат шарттары мен бекітілген стандарт талаптарына сай қызмет етуі тұрақты түрде қадағаланып тұрады. Осындай тыңғылықты жұмыс пен тынымсыз еңбектің нәтижесінде өңірде халал өнімге деген сұраныс артып, сертификаттаудан өтуге ұсыныс білдірген кәсіпорындар саны да артуда. Кәсіби тексеріс пен жіті қадағалаудан өткен "MEDIEVA SUSHI & PIZZA" фаст-фуд өнімдері, "Halva" дәмханасы, "Firdaus" мейрамханасы, "Тай" шұжық өнімдері "QMDB Halal" сертификатына ие болды. Аталған кәсіпорындар "Тамақтандыру қызметтері", "Халал өнімдерді өндіруге, өңдеуге, дайындауға, сақтауға, тасымалдауға және сатуға қойылатын жалпы талаптар" стандартына сай деп танылды", – деп хабарлайды жергілікті өкіл Ысқақ Абдрахманов.

"MEDIEVA SUSHI & PIZZA" фаст-фуд өнімдері, "Halva" дәмханасы, "Firdaus" мейрамханасы, "Тай" шұжық цехы, "HANI BRUNCH"  кондитерлік өнімдерінің "Халал Даму" мамандары тарапынан толықтай тексеріліп, зертханалық сынақтан өткізілгендігін, аталған кәсіпорын өнімдері мен өндірісінің "QMDB Halal" стандартына сай екендігін хабарлаймыз!

Ақтөбе: Бірнеше кәсіпорынға халал сертификаты табысталды

Ақтөбе облысының бас имамы Серікжан Еншібайұлы мен «Халал Дамудың» аймақтағы жауапты өкілі Жарасхан Әбдісаламов халал стандарт талаптарына сай деп танылған бірқатар кәсіпорынға «QMDB HALAL» сертификатын табыс етті.

Атап айтқанда, «Рамазан» ЖШС-ның жұмыртқа өнімі мен «Kish-mish» кафесіне халал сертификаты берілді. Сонымен қатар «MY BRO» ет дүкені «Халал өнімдерді өндіру, өңдеу, дайындау, сақтау, тасымалдау және сатуға қойылатын жалпы стандарт» талаптары бойынша сертификатын жаңартты.

ҚМДБ-ның «Халал» сертификаты барша мұсылман қауымының сенімін арқалайтын құжат болғандықтан, «Халал Даму» тарапынан кәсіпорындар мен мекемелерді тексеру барысында кәсіпорынның қызметі, тағам өнімдерінің құрамы халал стандарты талаптарына сай болуына, құжаттарының дұрыстығы үнемі қадағаланып, тексеріліп отыруына аса мән беретіндігі туралы бақылаушы-инспектор Жарасхан Әбдісаламов сертификат табыстау барысында атап өтті.