Қазақстандықтар күнделікті тауарлар мен қызметтер үшін цифрлық активтермен QR-код арқылы төлем жасай алады. Бұл туралы Үкімет отырысында Жасанды интеллект және цифрлық даму вице-министрі Ғиззат Байтұрсынов мәлімдеді.

Жаңа сервисті Binance Kazakhstan және Alatau City Bank бірлесіп іске қосты. Төлем механизмі қарапайым: сатып алушы криптовалютаны цифрлық әмиянынан есептен шығарады, ал сатушының шотына қарапайым қолма-қол ақшасыз төлем ретінде теңге түседі.

«Бүгінде бұл сервис Қазақстан бойынша 5 мыңнан астам сауда нүктесінде қолжетімді. Қазірдің өзінде 100-ден астам транзакция жасалды», – деді Ғиззат Байтурсынов.

Вице-министрдің айтуынша, сервиспен қамтуды одан әрі кеңейту жоспарланып отыр. Келесі кезеңде жүйені Halyk Bank, Freedom Pay және Tarlan платформаларымен интеграциялау көзделген.

Сонымен қатар, Жасанды интеллект және цифрлық даму министрлігі серіктестерімен бірге күнделікті есеп айырысуда теңгеге байланған стейблкоиндерді енгізу мүмкіндігін қарастырып жатыр.

Осылайша, Қазақстанда цифрлық активтерді күнделікті төлемдерге пайдалану инфрақұрылымы біртіндеп кеңейіп келеді. Сатып алушы криптовалютамен есеп айырысқанымен, саудагер қаражатын теңгемен алады.

Қазақстандықтардың әлем бойынша 1 млн криптоәмияны бар

Алдағы кезеңдегі негізгі міндет – бұл клиенттерді АХҚО-ға көшіру.

Бұл туралы АХҚО Авторизация және қаржылық технологиялар офисінің басқарушы директоры Еркеғали Еденбаев айтты, деп хабарлайды inbusiness.kz сайты.

"Сарапшыларға сәйкес, қазақстандықтар әлем бойынша 1 миллион криптоәмиянға ие. Бұл жасалатын операциялардың біразы шетелдік платформаларда екенін көрсетеді. Алдағы кезеңдегі негізгі міндеттердің бірі – осы клиенттерді АХҚО-ға көшіру. Қазіргі кезде бес халықаралық криптоплатформа АХҚО-да лицензиялаудан өтуде, оның екеуі әлемнің ең ірі он криптобиржасына кіреді. Осылайша, мақсат – цифрлық активтерді реттеумен шектелмей, қазақстандықтардың операцияларын қауіпсіз және реттелетін ортаға ауыстыру", – деді Еркеғали Еденбаев.

Спикердің сөзінше, АХҚО-да цифрлық активтер саласында қызмет көрсететін 35 провайдер бар.

"Олардың қатарында 11 цифрлық активтер биржасы бар, оның ішінде әлемдегі ең ірі криптобиржа Binance және төртінші криптобиржа Bybit. Сонымен қатар, 16 инвестициялық қызметтер провайдерлері, 8 төлем ұйымы, оның ішінде 3 стейблкоин эмитенті жұмыс істейді", – деп атап өтті АХҚО Авторизация және қаржылық технологиялар офисінің басқарушы директоры.

Балжан Смаилова