Алдымен Руслан Дәленов сенаторларға жаңа салық кодексінің маңызын түсіндірді.

«Бизнес барлық түсініксіз жағдайларды салық салушылардың пайдасына шешпеу қажеттігін алға тартады. Кемшіліктер болады. Біз адал бизнесмендерді қорғаймыз деп нені айтқымыз келеді? Біріншіден, енді заңдағы анық емес тұстар салық төлеушінің пайдасына шешіледі. Аталған принцип салықтық дауларды әділетті шешуге мүмкіндік береді», - деді ол.

Сонымен қатар, Ұлттық экономика министрлігінің бірінші вице-министрі жаңа кодексте электронды сауданы дамытуға серпін беретін өзгерістер енгізілгенін атап өтті. Оның айтуынша, елімізде тек қана электронды саудамен айналысатындар екі салықтан босатылады. Ол – корпоративтік және жеке табыс салығы.

«Заңдағы тағы бір түзету – электронды саудаға байланысты. Қазіргі таңда жеке тұлғалар, өздерін жұмыспен қамтып отырған азаматтар арасындағы сауда Интернет, Whatsapp, Instagram желілері арқылы жүретін болды. Біз электронды сауданы дамытуға серпін беруге тырыстық. Яғни, тек қана электронды саудамен айналысатындарды корпоративтік табыс салығынан және жеке табыс салығынан босату ескерілген. Заңда аталған түзету бар. Ол 5 жыл бойы жұмыс істейді. Бұл елімізде электронды сауданы жандандырып, оны заңдастырады», - деп түйіндеді сөзін Руслан Дәленов.