Қазан айының 4-і күні Мәскеу мегаполисінің «Юбилейный» деп аталатын дене шынықтыру және сауықтыру кешенінде ашық аспан астында Құрбан айт мерекесінің құрметіне орай мұсылмандар арасында футболдан жарыс өтеді. «Құрбан байрам» мини-футболын «Футбол бауырластығы – 2014» бағдарламасы аясында өтеді. Бұл жайында IslamNews ақпарат агенттігі хабар таратты. Бұл шараға Мәскеу қаласының діни ұйымдармен байланыс орнату және ұлттық саясат, аймақ аралық ынтымақтастық департаменті мұрындық болып отыр. Аталмыш турнирде 6 команда бақ сынайды: татарлардың республикалық ұлттық командасы, қырғыздардың «Алато»-сы, тәжіктердің «Нұр» командасы, шеркештердің «Адыги»-і, «Башқұрстанның жерлестігі» және «Мұрагер» қазақ мәдени қоғамдастығы.