Күншығыс еліндегі алғашқы мешітке бірер жылдан соң бір ғасыр толады. Бұл жайында islam.kz порталы ArabNews ақпарат көзіне сілтеме жасай отырып мәлім етеді. Коба қаласындағы үш қабатты ежелгі мешіт 1935 жылы салынған. Оның сәулетін Иан Суаграм есімді чех сәулетшісі жобалаған: құлшылық ететін, яғни, намаз оқитын зал, ақ мәрмәрдан соғылған мінбер мен михраб. Күншығыс еліндегі алғашқы мешіттің сәулетін чех азаматы жобалағанымен оның құрылысын татар эмигранттары жүргізген. 1936 жылдың тамыз айының 6-ы күнгі мерзімді басылым дерегі бойынша самурайлар еліндегі мұсылмандардың ғибадат ғимаратының салтанатты ашылуына Кобе қаласының басшысы Гиндзиро Кацуданың өзі қатысқан. Бұл мешіт екінші дүниежүзілік соғысқа куә болған әрі 1995 жылы Кобедегі мыңдаған адамның өмірін қиған аса күшті зілзалаға төтеп берген.