«Құрбан» сөзінің мағынасы «жақындау» дегенді білдіреді. Адам сүйгенімен бірге болуды қалайды, ол үшін ең құнды нәрсесін жұмсайды, барлық қиыншылыққа төзеді. Алла һпен бірге болу үшін, Оған жақын болу үшін де кісі құрбандық шалады.

Әнәс (р.а.) былай дейді:

«Ансарлардың Мәдинадағы құрма бақшаларының басым бөлігі Әбу Талханың (р.а.) еншісінде еді. Оның ең сүйікті дүниесі пайғамбарымыздың (сАлла ллаһу аләйһи уә сәлләм) мешітіне қарама-қарсы орналасқан Бәйруха атты құрма бағы болатын. РасулАлла (салла ллаһу аләйһи уә сәлләм) сол бақшаға жиі барып тұратын еді. Бірде «Жақсы көрген дүниелеріңнен Алла жолында жұмсамайынша, ізгілікке жете алмайсыңдар» деген аят түскенде, Әбу Талха келіп:

- «Уа, расулАлла һ, Алла тағала сізге жаңа аят түсірді. Менің ең жақсы көретін дүнием Бәйруха. Енді оны Алла тағаланың разылығы үшін садақа етіп беремін. Алла тағаланың құзырында оның жақсылығын көруді әрі мен үшін сауап қоры болуын тілеймін. Сіз соны қабыл алып, Алланың қалауы бойынша пайдаланыңыз» деді. Сонда Алла елшісі (сАлла ллаһу аләйһи уә сәлләм) оған:

- «Бәрекелді, жарайсың! Мол табыс әкелетін дүние, міне, осы» деп екі қайтара айтып:  «Шынайы ықыласыңды көрдім. Алайда, оны жақын туыстарыңа бөліп бергенің дұрыс деп ойлаймын» деді. Сонда Әбу Талха (р.а.):

- «Ендеше, айтқаныңыз болсын, солай істейін» деп бақшаны ет жақындары мен немере аға-інілеріне үлестіріп берді»[1].

Затты жақсы көріп, оның иесін жақсы көрмеу қандай ақымақтық болса, дүниені жақсы көріп, оның шынайы иесі Алланы жақсы көрмеу де сондай ақымақтық. Сондықтан дүниені шынайы иесі Алла үшін жұмсау, бұйырғанын істеу арқылы Алла тағалаға жақындай түсеміз. Құранда: «Тапқан малың, тоқтап қалуынан қорыққан саудаларың, жақсы көрген үйлерің сендерге Алладан, пайғамбарынан әрі Алла жолында соғысудан артық көрінсе, Алланың әмірі келгенге дейін күтіңдер. Алла бұзық қауымды тура жолға салмайды» делінген[2].

Құрбан малы Алладан, пайғамбарымыздан (сАлла ллаһу аләйһи уә сәлләм) артық емес. Дүниедегі барлық нәрсе Алланың жолында жұмсалса ғана құнды болады, мәңгілікке айналады.

Құрбан шалу – ықыластың белгісі

Құрбан малы таза ниетпен шалынады. Алла бұйырғандығы үшін, Алланың атымен, Алланың разылығы үшін шалынады. Шынайы ықылас деген осы. Құранда

«Ендеше, сен Раббың үшін намаз оқы және құрбан шал» деген аят осы ықыластан таймау үшін айтылған. Алла тағала пайғамбарымызға (сАлла ллаһу аләйһи уә сәлләм):

«Сенен бұрын бір пайғамбар жіберсек, оған: «Менен басқа ешбір тәңір жоқ. Маған ғана құлшылық қылыңдар» деп қана уахи етіп жібердік»[3]деген.

 Барлық ғибадаттар мен құрбан шалу да осы ықылас аясына кіреді. Алладан басқасы үшін құрбан шалу – харам. Пайғамбарымыз (сАлла ллаһу аләйһи уә сәлләм):

«Алладан басқаның атымен құрбан шалғанды қарғыс атсын» деген[4]. 

"Құрбан шалу (хикметтері мен үкімдері)".