Ұрыс-керіс - денсаулыққа зиян. Бұндай тұжырымды жұбайлардағы жараның жазылу барысын бақылаған американдық ғалымдар жасап отыр. Жарты сағатқа ұласқан ұрыс - сауығу үрдісін кәдімгідей бәсеңдетіп, иммунитетті төмендеткен. Мамандардың айтуынша, жанжалдан туған жанұядағы жайсыздық, жүрек ауруы бар жұбайлардың ажал құрығына ілігу қауіпін екі есе ұлғайтатын көрінеді. 

Америкадағы Огайо университетінің ғалымдары "30 минуттық кикілжің жараның жазылуын тұп-тура бір күнге кешеуілдетеді" деуде. Жанұяда болған ұрыс-керіс, дау-жанжал адам организміне кері әсерін тигізбей қоймайды, тіпті, денсаулық үшін де аса қауіпті екен. 

Зерттеушілердің бірі науқас жұбайларға тексеру жүргізген. Сынаққа қатысқан 42 пар жұбайдың жас мөлшері 22 мен 77 аралығанда. Вакуумды насоспен әдейі қатысушылардың қолдарына беті торсылдаған жара түсірілген. Іле бұл жаралар екі мәрте тексеріліп отырған. Біріншісі - жұбайлар өзара жарасымды әңгіме-дүкен құрып отырғанда, екіншісі - өзара сынық қабақ танытып, ұрысып-керіскен кезде. Әйел мен еркек өзара дауыс көтеріп сөйлескен кезде жараның жазылуы анағұрлым кешеуілдеген. Жұбайлар ренжісіп, стресске ұшырағанда, олардағы жараның жарты сағатта жазылуы толықтай алғанда 60 пайызға кешіккен. 

Ғалымдардың түсіндіруінше стресс зақымданған жердегі қанның қабынуға қарсы ақ клеткаларды өндіретін белок молекуласы - цитокин өнімін тежейді. Жараның алғашқы жазылу сатысындағы ең үлкен рөлге осы цитокиндер ие, - деп хабарлайды "Мембрана". Бұндай тұжырым стресстің иммунитетті төмендететіндігін көрсетуде. Ал, өз кезегінде ондай жайттың дене сауығуын тежейтіндігін даусыз. 

"Бұл, расында да, өмір мен өлім мәселесі", - дейді "Американың кардеология журналында" жарияланған мақаласында, Пенсильвания университетінің профессоры Джеймс Койн, - отбасындағы үздіксіз болып тұратын ұрыс-керістер стрессті жағдайға ұшыратады. Бұл, әсіресе, жүрегі сырқат жандар үшін анағұрлым қауіпті" - дейді ол.

"Ырың-жырыңнан құлақ тынбай, жиі ыдыс-аяқ сықырлайтын отбасында тұратын жүрек қан тамыры жүйесінде дімкәсі бар адамның ауруы асқынып, инсульт немесе инфарктқа шалдығып, өмірімен қош айтысу ықтималы екі есе көп" деп жазады Руссиян-базар. 

Медиктердің айтуынша, әйел мен ер арасындағы жағымсыз ұрыс-керістер балаларға да айтарлықтай кері әсер етеді екен. 6500 балаға тексеру жүргізген Британиялық ғалымдар үнемі әке-шешесінің ұрыс-керісіне куә болатын балалардың жиі сырқаттанатындығын анықтаған. Бұған қоса, стресске жиі тап болған балаларда өсу гормондары да бәсеңдейтін көрінеді.

islam.kz