ҚР Денсаулық сақтау министрлігі елімізде өлімнен кейінгі донорлықтан бас тартуды тіркеу тетігі жайында түсінік берді. БҰл туралы kaz.inform.kz ақпарат көзі хабарлады.
«Қазіргі кезде Қазақстан Республикасы Денсаулық сақтау министрінің 2020 жылғы 21 желтоқсандағы бұйрығына сәйкес, "Трансплантациялау мақсатында ағзалардың (ағза бөлігінің) және (немесе) тіндердің (тін бөлігінің) қайтыс болғаннан кейінгі донорлығынан тірі кезінде бас тарту немесе келісім алуды тіркеу" мемлекеттік қызметтің формасы медициналық - санитариялық алғашқы көмек арқылы қағаз нұсқада немесе электронды үкіметтің веб-сайтында ұсынылады», - делінген министрліктің Kazinform агенттігіне берген жауабында.
Айта кетейік, жақында ҚР Денсаулық сақтау министрі Ақмарал Әлназарова Қазақстанда заң деңгейінде адам қайтыс болғаннан кейінгі донорлық тәртібіне қатысты жұмыс реттелгенін айтты.
«Дегенмен, бұл салада жетілдіретін тұстары бар шығар, бірақ ол тек заңнамалық базаға байланысты емес. Бұл жерде халықтың денсаулық сақтау жүйесіне деген сенімі өте үлкен мәселе. Атап айтқанда, осы саладағы мәселелерді егжей-тегжейлі пысықтаймыз... Менің ойымша, халықтың өзі бұған дайын болуы керек. Біріншіден, мұны мәжбүрлі түрде жасауға болмайды. Біздегі заңнама ағза донорлығын дұрыс ұйымдастыруға мүмкіндік береді», - деді министр.
Еске салсақ, 4 мыңға жуық қазақстандық ағза алмастыру кезегінде тұр.
Руслан Ғаббасов
Ағзасы донорлыққа берілген марқұмдардың туысына ақы төлене ме
Денсаулық сақтау министрлігі Kazinform сауалына жолдаған жауабында ағзасы донорлыққа берілген марқұмдардың туысына ақы төлеу мәселесіне байланысты түсініктеме берді.
«Ағза донорының туысына өтемақы төлеу мәселесі ведомствоаралық деңгейде талқыланады. Өйткені бұл мәселе қаржылық, құқықтық және басқа да аспектілері қамтиды», - делінген жауапта.
Бұған дейін ведомство Қазақстанда өлімнен кейінгі ағза донорлығы қалай дамығанын айтқан болатын.
«2019 жылға дейін жыл сайын өлімнен кейінгі ағза донорынан жасалған ағза алмастыру оталарының саны 86-ға дейін жетіп отырды. Әлемде өлімнен кейінгі ағза донорлығының көрсеткіші бойынша АҚШ; Испания, Хорватия елдері көш басында тұр. ТМД елдерінің ішінде Беларусь тізімнің алдында. Бұл елдерде өлімнен кейінгі ағза донорлығының көрсеткіші орта есеппен 1 млн адамға 31-ден келеді. Дүниежүзілік денсаулық сақтау ұйымының жаһандық есебі бойынша, Қазақстанда бұл көрсеткіш — 0,021», — деп жазылған министрлік мәліметінде.
