Діни көзқарасы үйлеспегендіктен ажырасып кеткен бір отбасыны білемін. Бақытты шаңырақ еді. Екеуінің Қыз Жібек пен Төлегенге бергісіз маxаббатын дос-жарандары жыр қылып айтатын. Алла Тағала оларға шаңырақтарына шаттық кіргізер бірінен бірі өткен сүйкімді қос сәбиді де, шалқыған дәулетті де берді.

Алайда араларына сайтан кірді. Сайтан оларға дін арқылы кірді. Таң қаларлық-ақ жағдай. Дін деген қайта отбасын бекіте түспеуші ме еді?! Сонда ол қандай дін? Жігіт әйелінің ұғымынша таза тін - сәлафилік ағым. Ағым емес, ислам дегеніміз сол. Өзгелердің бәрі адасушылар. Оның ішінде нағыз шектен шыққандар - қазақтар. 
Не керек, интернет уағызшыларына бой алдырған әйел бір күнде тұмшаланып шыға келді. Күйеуінің де дінге сай жүруін талап етті. Сақалсыз "қатын бет" (өз сөзі) еркектердің бетіне қарауға жиркенетін болды. 
Бір күні ыңғайына көнбеген күйеуіне талақ берді де (әйел талақ беруге құқылы емес), шетел асып кете барды. Балаларына да қайырылып қараған жоқ. Ол жақта сақалды біреуге (ұлты белгісіз) тұрмысқа шықты. Одан бала да сүйді. Алайда дәм-тұздары жараспай туған елге қайта оралды. 
Ал күйеуі... Оның әйеліне деген сүйіспеншілігі шынайы еді. Оны алған бетінен қайтару үшін қолынан келгенін істеп-ақ бақты. Тек... Иә. Сақал қоя алмады. Ал әйелі болса сақалсыз еркекке қарай алмайды. Содан да олар бір-бірімен перде сыртынан сөйлеседі. Сүйген соң амал бар ма, тапқан-таянғанын да перде сыртынан беріп кетеді. Үйін де соған біржола қалдырған. 
Мен ол жігітті сырттай білемін. Әлгі әйелдің діни көзқарасын өзгерткім де келді. Бірақ... Иә. Менің де сақалым жоқ. Ал сақалдылар уағызы әлгі әйелді осындай күйге жеткізді.
Әр отбасы мемлекеттің бір бөлшегі ғой. Сондықтан мұндай келеңсіздіктердің өріс алуына мемлекет тарапынан тосқауыл қойылмаса, шырқы бұзылған шаңырақтардың көбейе беретіндігі күмәнсіз.